Aceh Utara, newsataloen.com – Peumeurintah Kabupaten Aceh Utara geupeugot Upacara Milad 800 Thon Bumoe Samudra Pasee ngon Uroe Lahei Kabupaten Aceh Utara. Acara nyoe geupimpin langsung lé Penjabat Bupati Aceh Utara, Ismail A. Jalil, S.E., nyang geulangsông bak Leuen Kantor Bupati, Lhoksukon, Senin (7/9/2026).
Peringatan thon nyoe teuka ngon saboh keunangan seujarah nyang paleng peunteng. Meunan nyang na teusurat lam Qanun Kabupaten Aceh Utara Nomor 10 Thon 2017, hukôm ka geupeuteunte bahwa Uroe Lahei Kabupaten Aceh Utara rhet tiep tanggal 7 buleun sikureung (September).
Asai mula peuteunte uroe keujadian nyoe geucok nibak dua boh sampeuna. Sampeuna seujarah nyang phôn nakeuh geucok nibak thon batei jrat nyang paleng tuha di wilayah Aceh Utara, milek Raja Ahmad ngon Ibnu Mahmud. Bak batei jrat nyan meu-ukei thon 622 Hijriah atawa thon 1226 Masehi, nyang jeuet keu pangkai mula lahei jih kabupaten nyoe.
Sampeuna keuda, geucok nibak masa seujarah Bumoe Samudra Pasee nyang toem na lam saboh masa paleng meusyuhu (kejayaan) di Nusantara.Lam amanat jih, Bupati Ismail A. Jalil peugah rasa seuneung ngon teureumong gaseh keu ban mandum ureung duek di Aceh Utara.
"Syedara-syedara lôn nyang meubahgia, uroe lahei Kabupaten Aceh Utara kon cuma saboh uroe peuingat seujarah. Nyoe nakeuh watei ta peurayeuk seumangat, ta peukong rasa gaseh keu tanoh nyoe, ngon ta peu-caya keu kamoe nyoe dum, chik putik, tuha ngon muda. Bah jeuet keu meulanjutkan peubangonan Aceh Utara nyang bangket dan leubeh jroh," meunan geupeugah lé Ismail A. Jalil.
Beliau meunyatakan cit, seujarah rayek nyoe kon keu ta peubangga mantong, tapi jeuet keu ceureumeun keurija ban mandum. Peumeurintah Kabupaten Aceh Utara meujanji sabe meu-usaha peuwujud daerah nyoe nyang makmue, seujahtera, ngon meukeuadilan.
"Hudep geutanyoe na lagee sikrek taloe nyang meusambong-sambong, pue nyang ta teurimong nibak indatu ta peutroh keu aneuk-cucoe. Maseng-maseng geutanyoe hana ubah lagee si urat beunueng nyang peugoet ija, lagee saboh gleung nyang peugoet rante," tambah Bupati, geupeuingat keu peunteng jih got-royong.
Ismail A. Jalil yakin, ngon na dukôngan nibak ban mandum pihak, Aceh Utara han meureusak ukeue. "Tapi lôn peucaya, seulama aneuk muda Aceh Utara mantong behoe meulumpoe, seulama ulama mantong geujaga arah geutanyoe, seulama masyarakat mantong geutem keurija, dan seulama peumeurintah mantong geutem deungoe su rakyat, Insya Allah, Aceh Utara han akan pernah gadoh masa ukeue," nyan keuh peugah Bupati.
Bak akhé upacara, Bupati geubri horeumat ngon tabek keu ban mandum tokoh nyang na: Nyang kamoe peumulia Peutuha Majeulih, Mahkamah Rakyat ngon Anggota ban mandum, Nyang kamoe peumulia Bentara Muda ngon Anggota, Nyang kamoe peumulia Ulee Balang ngon Anggota, Nyang kamoe peumulia Tgk Jaksa ngon Anggota dan Peutuha-peutuha di Bale Rhungsari ngon Bale Gadeng di wilayah Samudra Pasee.
Upacara nyoe geukeubah keu saboh momen nyang paleng peunteng, keu ta peuingat seujarah ngon jaroe droe teuh seureuta seumangat barô keu peumakmue tanoh pasee. (tim/red/ops/mi).
إرسال تعليق